Nagpatigayon kahapon sang aerial assessment ang Office of the Civil Defense-6 upod ang Department of the Environment and Natural Resources, Department of Public Works and Highways, Department of Science and Technology kag Provincial Disaster Risk Reduction and Management Office sa northern Negros Occidental nga naapektuhan sang pagbaha.
Sa interview kay Aletha Nogra, Disaster Risk Reduction and Management Division Chief sang OCD-6, ginpahayag sini nga isa sa mga rason nga ila nakita kun ngaa nagabaha amo nga silted na ang Malogo kag Embang river basin.
Magluwas diri, may yara man sang climate forecast kag outlook ang Pagasa nga ang Negros island ang maka-eksperyensya sang above normal rainfall sa ulihi nga quarter sang 2020 tubtob subong nga bulan.
Suno kay Nogra, ang assessment report ang ila nga ipadala sa National Disaster Risk Reduction and Management Council (NDRRMC) para maka-request sang intervention kag assistance agud ma-mitigate ang pagbaha kag makahimo sang dugang nga pagtuon kun ngaa nagakatabo ini sa probinsya.
