Nakahanda na ang tanan nga Local Government Units sa Rehiyon 6 sa paglabay sang Bagyo Auring sa rehiyon.
Sa interview sang Bombo Radyo kay Ma. Aletha Nogra, chief sang Disaster Risk Reduction and Management Division sang Office of the Civil Defense Region 6, ginpahayag sini nga apisar wala pa sang storm warning signal sa area of responsibility sang rehiyon, nagpagwa na sang memorandum ang Regional Disaster Risk Reduction and Management Council (RDRRMC) nga ginapangunahan sang Office the Civil Defense nga yara sa gihapon sa red alert status bangud sa COVID-19 pandemic kag iban pa nga natural hazzards nga nagakahulugan nga nalakip ang Tropical Storm Auring.
Kadungan sini, yara sila sa highest level of coordination kag 24/7 nga nakabukas ang Emergency Operations Center nga may duty personnel nga nagikan sa OCD 6 kaupod ang personnel sang Armed Forces of the Philippines nga nakaduty man kag nahamtang ang opisina sa Camp Martin Delgado sa syudad sang Iloilo.
Nakafull alert man ang PNP, BFP kag coast guard.
Ginpahayag man ni Nogra nga magluwas sa natumod nga regional evacuation centers sa napilian nga Local Government Units sa rehiyon, may yara man sang gintumod nga evacuation centers ang tagsa-tagsa ka LGUs para sa ila mga residente.
Aminado man ini nga isa sa weakness sang disaster risk reduction and management ang mga pumuluyo nga wala nagakooperar sa ginapatigayon nga pre-emptive evacuation.
Suno kay Nogra, ang pinakamaayo nga disaster response amo ang pre-emptive evacuation gani nagpanawagan siya sa mga pumuluyo nga kooperahan ini agud masiguro nga luwas sila kun yara na ang mga ini sa hilway nga lugar.
Nagpanugyan man ini sa tanan nga nagapuyo sa coastal areas, suba kag creek nga mag-aligmat.
