Bukas na ang OFW helpdesk nga ginbutang sang Negros Occidental agud nga mag-cater sang mga concerns sang mga himata nga yara sa Middle East nga naapektuhan sang pag-ilinaway sa tunga sang Estados Unidos, Israel kag Iran.
Sa interview sang Bombo Radyo Bacolod kay Negros Occidental Provincial Administrator Atty. Rayfrando Diaz, ginmando na ni Negros Occidental Governor Eugenio “Bong” Lacson nga hatagan sang supporta ang mga Negrense nga naapektuhan sang tensyon.
Suno kay Diaz, kahapon, nagreport na ang tanan nga team nga magacater sang tanan nga tawag sa tanan nga may concerns.
Sa karun isa pa lang ang nakatawag sa ila kag ini ang residente sang banwa sang Isabela nga magapadulong kuntani sa Riyadh apang sa Hong Kong pa lang gincancel na ang iya nga flight kag ginpabalik sa Manila.
Nagacoordinate naman ang probinsya sa nasambit nga persona agud nga mahatagan sang nagakaigo nga bulig agud makabalik na ini sa Negros Occidental.
Ang numero nga mahimo nga matawgan sa tanan nga may concerns ukon may himata sa middle east nga nagakinahanglan sang bulig amo ang 09989569037 ukon 09241097705.
