Ginpahayag sang pinuno sang Bacolod City Drug Enforcement Unit nga may yara sang connection sa nakahunong sa Bilibid Prison ang tatlo ka mag-utod nga nakuhaan sang P1.3 million nga balor sang illegal nga druga sa Purok Kabugwason, Barangay Mansilingan, Bacolod City, Negros Occidental, kahapon sang kaagahon.
Ang mga suspetsado ang ginkilala nga sanday Eron Montalban, 35 anyos single, nagatrabaho bilang negosyante; ILyn Montalban, 26 anyos, single, wala sang trabaho kag Irene Montalban, 34 anyos, single, wala sang trabaho kag lunsay mga residente sang nasambit nga lugar.
Nakuha sa paghinakop sang tatlo ang kapin 200 grams sang suspected shabu nga may standard drug price nga P1, 360,000.
Ang tatlo ka suspetsado ang magapangatubang sang kaso sa pagbayolar sa Section 5 kag 11 sang RA 9165 ukon Comprehensive Dangerous Drugs Act of 2002.
Sa interview sang Bombo Radyo Bacolod kay Police Lt. Col. Antonio Benitez Jr. may yara sila sang nauna nga nagkaladakpan nga naghatag sang impormasyon nga ang nagadeliver sang supply amo ang tatlo ka mag-utod nga nadakpan man kahapon sa ginpatigayon nga police operation.
Suno kay Benitez ang isa sa mag-utod ang nagacontribute sang dako nga supply sang illegal nga druga sa Bacolod City.
Suno diri, ang tatlo ang may utod man nga nakahunong sa Bilibid Prison kag sa Bureau of Jail Management and Penology (BJMP)-Negros Occidental bangud man sa iligal nga druga.
Nakabaton man ang mga ini sang impormasyon nga ang katransaction sang tatlo sa illegal nga druga ang contact sang ila utod nga yara sa Bilibid Prison sa ginakuhaan sang supply sang ilegal nga druga.
Ginakabig nga High Value Individual si Eron Montalban samtang duha ka mga babayi ang nagabulig naman sa pagbaligya sang illegal nga druga.
Sa karun, magapangatubang ang tatlo sang kaso nga paglapas sa Section 5 kag 11 sang RA 9165 ukon Comprehensive Dangerous Drugs Act of 2002.
