Aminado ang presidente sang transport group nga United Negros Drivers and Operators Center-Pagkakaisa ng mga Samahan ng Tsuper at Operator Nationwide (UNDOC-PISTON) nga dako ang P10.00 nga pasaka sa pamasahe nga ginapanawagan sang ila nga counterpart sa national.
Sa interview sang Bombo Radyo Bacolod kay Rodolfo Gardoce, ginalantaw sini nga tuman kadako ang ginapangayo nga pasaka sa pamasahe sang PISTON kag nakahibalo man ini nga indi ini pag-aprubahan sang Land Transportation Franchising and Regulatory Board (LTFRB) kag nakahibalo ini nga tuman ini kadako para sa mga commuters.
Suno kay Gardoce, indi man nila luyag nga madugangan ang kabudlayan sang mga pasahero bangud wala man nagasaka ang sweldo gani ang ginapanawagan nalang kuntani nga mapabalik lamang sa P55 ang kada litro sang gatong.
Dugang pa sini nga madugay na ang ila nga hulat sa fuel assistance nga ihatag sang gobyerno apang tubtob sa karun wala sa gihapon mag-abot kag nauna pa nga mahatagan ang mga tricycle drivers.
Nakabaton man sila sang lima ka kilo nga bugas halin sa Bacolod City Government apang indi man tanan ang nahatagan.
Suno pa diri, bangud sa indi maagwanta nga presyo sang gatong madamo na sang mga drivers ang nagauntat sa pagbiyahe.
Ang mga nagabiyahe sa karun ang mga jeepney operator.
Diskarte nila sa karun agud nga may ipauli sa ila pamilya kun san-o lamang inugguwa sang mga pasahero amo ang ila nga pagbiyahe.
