Gin-athag sang medical doctor nga mahimo ang isa ka tawo nga mapatay kun sa paa maigo kun ini ang matiruhan bangud nga nawad-an sang dugo.
Ini matapos nga napatay ang si Police Master Sergeant Romulo Galvez matapos maigo sa paa sang gintiro sa ginpatigayon nga drug buybust operation sa Barangay Sincang Airport, Bacolod City sang subject person nga si Ronelo Panuncial.
Sa interview sang Bombo Radyo Bacolod kay Dr. Vicente “Itik” Iturriaga, ang femoral artery ang isa ka mayor nga ugat nga makita sa hita sang tawo nga konektado sa abdomen.
Suno kay Iturriaga, ang ini nga ugat ang nagahatag sang dugo sa mga ugat sa tiil.
Suno diri kun ang isa ka tawo ang tiruhon kag ini ang maigo sa paa sarang ini nga mapatay sa pagkadula sang dugo bangud nagatubod lang ang dugo.
Suno sa doctor kinahanglan nga madala gilayon sa emergency room kag mapaidalom sa surgery agud nga mabuksan ang paa agud nga matapna ang pagtubod sang dugo.
Suno kay Iturriaga, kun indi mahingagaw sa sulod sang isa ka oras mapatay ang pasyente bangud naghubas ang dugo bangud indi ini madala sa first aid.
Ginkumpirmar man sini nga ang isa ka tawo ang sarang nga mapatay bangud sa overdose sang illegal nga druga.
Suno kay Iturriaga ang tawo kun nagagamit sang illegal nga druga ilabi na Methamphetamine ukon shabu kag naoverdose ang sarang mapatay.
Suno diri ang Methamphetamine overdose ang nangin kawsa sang brain aneurysm.
Dugang pa sini nga ang brain aneurysm ang isa man sa kawsa sang heart attack nga rason sang kamatayon sang isa ka tawo.
Suno pa diri ang drug dependent nga tawo ang wala nagapa-check sang ila blood pressure.
Ini bangud padayon lang ang mga ini sa paggamit sang ginadumilian nga druga kag ang mga ini nakahibalo nagasaka na ang blood pressure.
Nahibaluan nga ang suspek nga si Ronelo Panuncial ang napatay man nga nauna na nga ginhatagan sang sedatives sa ospital bangud nagawaras.
Sa karun padayon pa nga ginahulat ang autopsy result rason sang kinamatay sini.
