Ginaduso sang Metro Bacolod Chamber of Commerce and Industry ang pagpasar sang Rice Industry Development Act.
Sa interview sang Bombo Radyo Bacolod kay MBCCI chief executive officer Frank Carbon, ang pinakadako nga problema sa Pilipinas amo ang kakulang sang pagkaon, kag pagkamahal sang presyo sang pagkaon.
Ini man ang rasun kun ngaa antes paman ang May 12 Midterm Elections, gin-anunsyar sang administrasyon ang pagbaligya sang P20 kada kilo nga bugas.
Pahayag ni Carbon nga ini ang dako nga problema nga tubtob sa karun wala gihapon ma-address.
Suno diri, ginpropose na sadto sa House of Representative kag Senado ang Rice Industry Development Act, kaangay sa gintukod nga Sugar Industry Development Act.
Apang ini ang wala ginpasar sang mga Senador kag Kongresista, sa baylo, ang ginpasar amo ang Rice Tarrification Law.
Suno sa negosyante, kaangay lamang nga ginhambal sang mga mamalidha nga pabay-an anay ang produksyon sang bugas kag magsalig na lamang sa importasyon.
Pahayag sini nga sa karun, amo naman ang amat-amat nga nagakatabo sa industriya sang kalamay.
Magluwas sa pagfocus sa produksyon, dapat man nga tutukan ang imprastraktura kaangay sang mga irrigation system kasubong man ang developments sa mga airports, seaports kag iban pa.
