Ginkonsiderar na ni Bacolod City Mayor Albee Benitez nga indi na pagdayunon ang pagpatukod sang New Burgos Public Market sa ciudad sang Bacolod.
Ini ang kasunod sang pagpamatok sang mga market vendors sa Burgos Public Market bangud ginpahayag sang mga ini nga maapektuhan ang ila nga palangabuhian sa tion nga magsugod na ang construction sa nasambit nga merkado.
Sa pahayag sang alkalde, indi sini mahangpan kun ano gid ang luyag sang mga market vendors bangud naga-ayo man ang mga ini nga kay-uhon ang merkado apang indi ang mga ini pabor sa plano sang ciudad nga magpatukod sang bag-o nga merkado.
Ginpahayag man sini nga ginplastar niya man ang plano sa mga market vendors kag ginhambalan nga mahimo sila nga makasuggests sang bag-uhon kun wala nila mauyunan ang design apang nagpamatok ang mga ini.
Suno kay Benitez, kun indi ang Burgos Public Market, may yara pa sang duha ka merkado sa ciudad ang luyag magbaton sang pond agud nga makay-o ang merkado.
Suno sa alkalde, dapat panumdumon kuntani sang mga vendors nga kun maayo ang merkado mangin madamo man ang ila mga bumalakal.
Nahibaluan nga ang city government ang nagpain sang P525 million para sa renovation sang Burgos Public Market.
