Wala na sang plano pa ang pamilya sang lalaki nga ginluthang sa Brgy 2, Bacolod nga magpasaka sang kaso batok sa suspetsado.
Ginkilala ang biktima nga si Aljune Baticados alyas ‘Malic’, 30 anyos, wala sang trabaho, kag residente sang Purok Masagana, Brgy 6, Bacolod City.
Madumduman nga ginluthang si Baticados sang lalaki nga nagasuksok sang itom nga jacket, may tabon ang nawong, kag nagasakay sa itom nga motorsiklo sang Dominggo.
Nahimo pa nga manago ni Baticados sa mga dalagko nga truck sa area apang siya ang nakita sang suspek.
Gintinguhaan man sini nga malagyo apang nalagas sa gihapon sang suspek kag amo na nga gintiro.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, apisar nga indi interesado ang pamilya sang biktima nga magpasaka sang kaso, padayon naman ang ila nga pagtipon sang ebidensya agud nga masolbar ang kaso kag indi na maliwat pa ang natabo.
