BACOLOD CITY — Nagapanawagan ang mga opisyal sang Negros Occidental nga pangamuyuan ang mga miyembro sang Gabinete nga nag-abiso kay Presidente Rodrigo Duterte nga i-dissolve ang Negros Island Region.
Sa Good Morning Philippines Program sang Bombo Radyo Bacolod, ginpahayag ni Dr. Ma. Lina Sanogal, coordinator sang Provincial Planning and Development Office, nga indi na magkasubo ang mga pumuluyo sa pagkabungkag sang NIR bangud nasarangan gani sini nga magbangon sa krisis nga nagluntad pila na ka tuig ang nakaligad.
Pangabay ni Governor Alfredo Marañon Jr., suno kay Sanogal, pangamuyuan ang mga opisyal sang subong nga administrasyon nga masanagan, ilabi na si Budget Secretary Benjamin Diokno kag iban pa nga economic managers, kun ano ang nadangatan sang mga opisina nga naga-operate diri humalin sang Enero tuig 2016.
Nagalaom man ini nga mabuligan ang mga job order casuals nga madulaan sang trabaho kadungan sang pagkatunaw sang NIR.
Suno kay Sanogal, kuntani paboran man sang Malacañang ang hingyo sang mga regional offices nga himuon nalang nga sub-office sang Region 7 ang nahamtang sa Dumaguete City samtang iya naman sang Region 6 ang nahamtang diri sa ciudad sang Bacolod.
