Nagapanawagan ang isa ka pari sa ciudad sang Silay nga dapat ikabuhi ang mensahe sang pag-obserbar sang Semana Santa.
Sa interview sang Bombo Radyo Bacolod kay Fr. Agustin “Agot” Hinayan, Resident Priest sa St. John Marie Vianney Shrine, Domus Dei Compound, Silay City, ang pagsaulog sang Semana Santa amo ang pagobserbar sang mga ritual kag mga hilikuton sa pagkomemorar sang mga hinimuan kag natabo kay Jesus nga ginpadala sang Diyos nga amay agud nga magtubos sang mga sala sang katawhan.
Suno kay Fr. Hinayan dapat nga ikabuhi sang mga tumuluo ang mensahe kun ngaa nagpalansang sa krus, napatay kag nabahaw si Ginoong Hesus.
Suno sa pari ang una gid ngaa ginhimo ni Jesus ang magpalansang sa krus kag napatay amo nga ang gugma bangud kun may gugma ang isa ka tawo ang handa magsakripisyo para sa kaayuhan sang iban.
Suno diri ang gugma ang mahimo man makaapekto sa tanan nga katilingban bangud ang Semana Santa wala lang ini natapos sa pagpahimo sang mga rituals.
Dugang pa sang pari nga kun may gugma mangin responsable kita nga mga pumuluyo sang Pilipinas gani sa maabot nga piniliay dapat pilion ang magapungko nga mga lideres ang may pagpalangga kag pagulikid sa pungsod Pilipinas.
Nagpanugyan man ini nga dapat patihan naton nga kita ang maayo nga mga tawo gani patawara ang imo kaugalingon bangud ang Diyos ang nagpatawad na sa imo.
