Nakaagi kana bala palupad sang eroplano sa mobile game, computer ukon arcade?.
Masarangan mo ayhan kun ikaw ang mapilitan nga magpalupad sang matuod-tuod nga eroplano?.
Isa ka pasahero nga wala sang eksperyensya sa pagpalupad sang eroplano ang nahimo nga mapahugpa ang magamay nga eroplano sa Florida airport sa Estados Unidos matapos nga makaangkon sang medical emergency ang piloto sang Miyerkules.
Ang nagserbe nga piloto nga naga-isahanon nga pasahero sang single-engine Cessna 208, ang nagsalig lang sa air traffic control nga amo ang naggiya sa iya agud nga hilway nga makahugpa sa Palm Beach International Airport, kapin 68 ka milya sa naaminhan nga bahin sang Miami.
Nahibaluan nga nakabatun sang emergency call sang udto sang Martes gikan sa pasahero ang mga opisyales sang Fort Peirce nga nagapahayag nga yara sila sa seryoso nga sitwasyon.
Pahayag sini nga incoherent ukon nadula sa wisyo ang piloto, kag wala ini sang ihibalo sa kun paano magpalupad sang eroplano.// Sang ginpamangkot ini kun sa diin na sila, sabat sang pasahero nga wala ini sang ideya apang makita na sini ang Florida coastline.
Ginhambalan naman ini sang air traffic official nga ipabilin lang ang lebel sang pakpak sang eroplano kag husuyon lang ang baybayon sa norte ukon bisan sa sur nga dereksyon agud nga ila ini nga makita.
Pahayag ni air traffic controller Robert Morgan nga nakabulig ang eksperyensya sini bilang flight instructor agud magiyahan ang pasahero, nga wala na ginpangalanan, sa pagpahugpa sini sang eroplano.
Suno kay Morgan, kalmado lang ang pasahero kag nagpahayag lang ini nga wala siya sang ihibalo sa pagpalupad kag wala man ini sang ihibalo kun paano mapauntat ang eroplano sa tion nga makatapak na sa runway.
Dugang pa ni Morgan nga matapos sang insidente, halos daw mahibi man ini bangod tuman kataas sang nahuptan sini nga adrenaline kag kakulba.
Suno diri, ginhakos siya sang pasahero kag ginpasalamatan bangod sa pagbulig sini agud nga hilway siya nga makabalik sa iya nagabusong nga asawa.
Wala naman ginapagwa kun ano ang kondisyon sang piloto ukon ang sahi sang medical emergency apang ginpahayag sang Palm Beach Fire Rescue nga isa ka pasyente ang gindala sa ospital makaligad nga nakahugpa ang eroplano.
