Mabug-at sa balatyagon sang mga responders ang pagkuha sang lawas sang mga biktima sa mini dump truck nga nahulog sa pil-as sa Sitio Orang, Brgy Kalamtukan, Bayawan City, kahapon sang aga, Pebrero 4.
Sa interview sang Bombo Radyo Bacolod kay Noreden Rendon, Brgy Responder sang Brgy Kalamtukan, nagkalabali-bali ang mga butkon kag batiis kasubong man ang dughan sang iban sa mga biktima.
Isa ini sa nagrescue sa driver nga si Egmedio Arnaiz, nga suno sa iya utod na ang kamot kag nagagwa ang tul-an.
Pahayag sa iya sang isa pa ka responders nga nagalingi-lingi man ang ulo sang biktima, gani ginalantaw niya nga nabali ang liog sini.
Apang isa sa mas mabug-at sa ila balatyagon ang sitwasyon sang isa ka biktima nga nagpangayo pa sang tabang.
Suno kay Rendon, kaangay nga nagapakitluoy ang biktima nga siya ang masalbar, bangod makaluluoy suno diri ang duha niya ka kabataan.
Apang ginakasubo sini nga ginbawian gid sang kabuhi ang biktima.
Madumduman nga napatay sa insidente sanday Egmedio Arnaiz, Diomedes Canoy, Kervin Andog, Larry Llamos, Ronel Cabasag, Jonathan Hamor, Jovanie Babor kag Jonaryl Caguisa, lunsay mga empleyado sang City Agriculture Office – Engineering Division kag ang isa ka On the Job Training (OJT) engineering student nga si Warren Arceñas.
Ang mga lawas sang mga biktima ang temporaryo nga ginbutang sa Villareal Gym para sa public viewing, kag sila ang ginpamisahan naman kaina.
Kasunod sini ang mga bangkay ang gindala na sang mga pamilya sa ila tagsa ka balay.
