BACOLOD CITY — Wala pa gihapon nag-sink in ukon indi pa gid mabatyagan sang number 5 sa Top 10 sang November 2017 Chemical Engineer Licensure Examination nga mataas ang iya nangin achievement.
Sa Good Morning Philippines program sang Bombo Radyo Bacolod, ginpahayag ni Jarjolen Jamora alyas Biboy sang Barangay Guinhalaran, ciudad sang Silay nga nagpabukot sila sa pension house nga ila gintiniran sa Cebu City sa adlaw mismo nga magagwa na ang resulta sang pasinawan kag isa lang sa ila ang naglantaw kun nakapasar sila ukon wala.
Sang ginbalitaan nga siya ang number 5, nagpalakpak si Jamora apang wala ini naghibi.
Suno diri, wala pa nagdulot sa iya paminsaron nga nakasulod siya sa Top 10.
Sa pihak sini, lubos ang pasalamat ni Jamora sa Mahal nga Diyos nga nagpadala sang mga instrumento agud nga siya ang makatapos.
Nagpasalamat man ini sa mga scholarship nga iya na-avail sa kolehiyo gani nga nakagraduate ini sa Colegio San Agustin Bacolod.
Subong nga isa na ini ka lisensyado nga engineer, luyag ni Jamora nga patapuson ang iya duha ka mga manghod.
Handom man niya nga mag-umwad ang ila pangabuhi agud nga mahatagan sang reward ang iya lolo kag lola nga nagpatapos sa iya sa pagtuon.
Nagpanugyan man ini sa mga pamatan-on nga magtuon sang maayo bangud mabudlay mangita sang trabaho kun wala sang tinapusan.
