Nangin matawhay kag malinong ang assessment sang kapulisan sa ciudad sang Bacolod sa pagsaulog sang Semana Santa.
Sa interview sang Bombo Radyo Bacolod kay Police Lt. Col. Ronnie Brillo, Commander sa Bacolod City Mobile Force Company, generally peaceful ang ila nga pagbantay sa Semana Santa kun sa diin wala sang dalagko nga kinagamo.
Paathag sini nga epektibo ang derektiba ni Bacolod City Police Office director Police Col. Noel Aliño nga pagpasanyog sang Police visibility kag Police presence sa mga areas nga ginatipunan sang mga pumuluyo kaangay sang malls, simbahan, resort kag mga ginapatigayon nga procession.
Wala man ang mga ini sang nabatun nga report sang pagpanulod sang balay.
Pahayag ni Brillo nga gindugukan sang tawo ang mga resorts sa Barangay Punta Taytay, apang madamo man ang ila nga gindeploy nga mga kapulisan agud masupervise ang mga aktibidad.
Kalakip sa ginbantayan sang mga ini ang Easter Egg Hunt nga ginpatigayon sa Bacolod City Government Center grounds kahapon.
Suno kay Brillo sila ang wala nagpangayo sang augmentation gikan sa Police Regional Office 6, bangod masarangan man sang BCPO ang augmentation.
Ginpasalamatan man sini ang pagsunod sang mga pumuluyo sa panawagan nga magkooperar, samtang ginpasalamatan man sini ang mga kapulisan nga nagpulaw-bugtaw sa pagseguro sang malinong nga Semana Santa.
Pasalig sini nga magapadayun sa pagtrabaho ang mga kapulisan may okasyon man ukon wala, agud mapabilin ang kalinong kag katawhayan sa Bacolod City.
