Nag-atubang sa mga otoridad kahapon ang pila sa mga anay kag player sang Ateneo de Manila University samtang nagapadayon ang imbestigasyon sa pagkamatay sang mga student-athlete nga sanday Rene Baterbonia kag Divine Adili.
Kalakip sa mga anay player sang Blue Eagle nga nagpadulong sa Criminal Investigation and Detection Group (CIDG) sa Camp Crame, Quezon City sanday Geo Chiu, Mike Nieto, Kymani Ladi, kag Dom Escobar.
Samtang, nag-atubnag naman sa National Bureau of Investigation (NBI) ang team member nga si EJ Kapihe angot sa imbestigasyon sa pagkamatay sang duha ka atleta kag sa mga team building activities nga ginpatigayon sa idalom sang head coach nga si Tab Baldwin nga nag-resign na sa pwesto.
Naghampang si Chui para sa Ateneo sa UAAP Seasons 82 kag 85, samtang nangin kabahin naman si Neito sa koponan gikan sa Seasons 80 tubtob 82. Sanday Ladi kag Escobar ang naghampang sa Ateneo sa sulod lamang sang isa ka season sang Season 88.
Napatay sanday Baterbonia kag Adili matapos malumos samtang yara sa training camp ang team sa Aurora.
Ang training camp ang isa ka off-season activity nga ginapatigayon sang Blue Eagles halin sang ginpangunahan ni Baldwin ang programa sang 2015.
Una na nga ginpahayag sang CIDG nga ila gina-usisa ang posibilidad nga may kaso nga homicide ukon paglapas sa Anti-haziing Law angot sa natabo nga insidente.
Nakabaton na man sang subpoena si Baldwin kag ang pila ka mga matag-as nga opisyal sang Anteneo apang wala sila nagtambong sang Lunes.
Natalana man nga magpaggwa sang subpoena para kay Ateneo President Fr. Robert “Bobby” Yap kag sa pila ka mga opisyal sang Smart Communications.
