Pila sa mga pumuluyo sa ciudad sang Bacolod ang naghatag lamang sang 5 out of 10 para sa performance ni President Ferdinand ‘Bongbong’ Marcos Jr. sa duha ka tuig sini nga pagpamuno sa Pilipinas.
Sa interview sang Bombo Radyo Bacolod kay Junie Piraan, tricycle driver sa Libertad Public Market, bisan maayo ang tinutuyo sang isa ka lider apang kun kaisa indi man maayo ang resulta sini pagdangat sa idalom.
Bangod indi tanan nga programa sang Presidente ang makabig nakabenepisyo sa target nga sektor, lima lamang ang ratings sini sang ginpapili sa one to ten kun sa diin 10 ang pinakamataas
Panawagan sini nga kuntani, maghimo sang long term solution si Marcos nga makapulos ang kadam-an.
Panawagan naman sini nga dapat magtinguha nalang gid ang tagsa ka Pilipino.
Samtang patas man ang panulok sang vendor sa gwa sang Libertad Public Market sa panggobyerno ni Presidente Marcos.
5 out of 10 man ang score ni Norman Tumargo, 63 anyos, nagabaligya sang mga kitchen utensils.
Panawagan sini nga ipanindugan lamang sang pungsod ang kinamatarong sa West Philippine Sea apisar sa pagpangagaw sang China.
Magluwas diri, luyag man niya nga mabatian sa State of the Nation Address (SONA) nga bisan paano mapasaka ang pension sang mga senior citizen.
Aminado ini nga dako na nga bulig ang karun nga pension, apang sa madasig nga pagsaka sang bili sang mga balaklon, hingyo sini nga bisan paano madugangan man ang ila nga panggastos.
