Nagapati ang alkalde sa ciudad sang Bacolod nga ang daludo sang mabaskog nga tubig gikan sa bukid ang nagtuga sang mga pagbaha kagab-i tubtob subong nga kaagahon kag indi lamang bangod sa mga clog sa drainage system.
Nahibaluan nga alas-10:00 sang gab-i pa lamang nag-umpisa ang pag-ulan kag ini ang nagtayuyon na tubtob kapin alas-3:00 sang kaagahon nga nagresulta sa mga pagbaha.
Sa interview sang Bombo Radyo Bacolod kay Bacolod City Mayor Greg Gasataya, sa peak sang pagbubo sang ulan, nagsunod-sunod na gilayon ang tawag nga nabataun sang Bacolod City Disaster Risk Reduction and Management Office sa pagpangayo sang rescue.
Paathag sini nga mayorya nga apektado amo ang northern part gid sang Bacolod, partikular na sa Barangay Bata, Banago, Mandalagan, Barangay 3, kasubong man sa Villamonte kag Taculing nga nagpangayo sang rescue sang kaagahon.
Kapin alas-11:00 sang gab-i, naglibot man ang alkalde sa mga apektdo nga lugar, kag nakita sini ang mabaskog nga pwersa sang tubig.
Suno diri, kun bangod sa taob kag clog sa drainage system, amat-amat kuntani ang pagsaka sang tubig.
Apang bangod sa nakita nga pwersa, nagapati si Mayor Greg nga ang tuman ka dako nga volume sang tubig-ulan nga nagdaludo gikan sa bukid ang rasun sa pagbaha.
Ginpasalamatan man sang alkalde ang mga rescue groups sang gobyerno kasubong man ang mga volunteer rescue groups nga madasig nga nagresponder.
Sa karun, wala pa sang datos ang alkalde sa kadamuon sang mga yara sa karun sa evacuation centers.
Pasalig sini nga padayunon sang ciudad ang mga declogging operations, apang nagpanawagan man ini sang kooperasyon sang mga pumuluyo.
