Nagpanghanda man ang pila ka mga lugar sa Southern Negros sa posible nga mangin halit ni Bagyo Auring.
Sa interview sang Bombo Radyo Bacolod kay Dr. Merijene Ortizo, pinuno sang Bago City Disaster Risk Reduction and Management Office, ginpahayag sini nga 24/7 ang ila monitoring sang bagyo sa ila nga emergency operations center.
Nakasapol naman ang CDRRMC sang ciudad agud hambalan ang ila pagpanghada sa malain nga panahon.
Suno kay Ortizo, ila ginatutukan ang mga yara sa coastal areas nga prone sa pagbaha subong man ang sa upland barangays nga dako ang risgo sa landslides.
Ginpasiguro man sini nga nakaposisyon na ang ila mga gamit kun kinahanglan nga gamiton.
Samtang, ginpasiguro naman ni Valladolid Mayor Enrique Miravalles nga preparado ang ila nga banwa sa matuga ni Bagyo Auring.
Suno sa iya, indi gid man tuman ka kusog sang pag-ulan sa ila nga lugar apang ginapa-alerto lamang sini ang ila nga DRRMO sa posibilidad sang pagbaha.
Ginpasalig man sang alkalde nga kun kinahanglanon nga ievacuate ilabi na ang mga yara sa shoreline areas, nakahanda na ang mga eskwelahan bilang evacuation centers.
