May nagbisita na sang timprano ang ila nga mga minatay sa Roman Catholic Cemetery sa Burgos Street, Bacolod City subong nga adlaw, Oktubre 31, besperas sang tigkalalag.
Ginsiraduhan naman ang Dalan Lopez Jaena padulong sa Bacolod Police Station 4 halin kaina sang aga tubtob na sa Nobyembre 2.
Gani ang mga salakyan partikular na ang mga public utility vehicle nga nagalabay sa dalan ang magakinahanglan gid sang rerouting.
Yara man ang mga personnel sang Bacolod Transportation and Traffic Management Department (BTTMD) agud maggiya sa mga motorista.
Sa corner sang dalan pasulod sang patyo yara man ang mga nagabaligya sang pagkaon samtang ang mga nagabaligya sang bulak kag kandila ang yara sa atubang sang entrance sang sementeryo.
Nahibaluan nga 158 ka mga flower kag candle vendors lamang ang ginhatagan sang permit sang Sangguniang Panlungsod para sa mga designated areas.
Sa pagsulod sa sementeryo, madamo naman sang mga nagasugata nga sepultorero nga naga-offer sa pagpinta, pagpanilyo ukon paglettering sa mga pantyon.
Ang visiting hours sa tanan nga pampubliko nga sementeryo ang yara lamang sa alas-6:00 sang aga tubtob alas-10:00 sang gab-i.
