Ginaduso karon sang Estados Unidos ang Pax Silica, isa ka global agreement para pabaskugon ang supply chain sang artificial intelligence (AI) kag semiconductor industry, kun sa diin kalakip ang Pilipinas sa 24 ka mga pungsod nga nagpirma.
Kabahin sa plano ang pagtukod sang isa ka 1,600 hectares nga AI industrial hub sa New Clark City, Tarlac agud iproseso ang mga kritikal nga mineral kag maghimo sang high-tech components para sa AI kag semiconductors.
Suno kay Department of Trade and Industry Undersecretary for Industry Development, Trade and Investment Promotions Ceferino Rodolfo, katuyuan sang proyekto nga mapasanyog ang high-value manufacturing kag mapabilin sa pungsod ang mga kritikal nga mineral sa baylo nga i-export ang mga ini.
Apang, ini ang hugot nga ginpamatukan sang pila ka mga environmental kag progressive groups.
Suno kay Kalikasan National Coordinator Cathleen De Guzman, dalagko ang mangin konsumo sang tubig kag kuryente sa diin 5 million gallons ka fresh water ang ma-konsumo sa isa lamang ka adlaw.
Gindepensahan naman sang palasyo ang proyekto kag nagpahayag nga may suspisyente nga source sa nasambit nga bahin.
Magluwas diri, ini ang mahimo magtuga man sang noise pollution nga makadisturbo sa local wildlife kaangay sang mga pispis.
Ginpabutyag man ni De Guzman ang posibilidad sang pagbakwit sang ginabanta 20,000 ka mga Aetas.
Ginpanginwala naman ini ni Development Authority (BCDA) President kag CEO Joshua Bingcang, nga nagsiling nga wala sang ancestral domain sa lugar sang proyekto.
Ginbatikos man sang Makabayan Bloc ang Pax Silica project, kag ginhingadlan ang proyekto nga “war initiative”.
Suno diri, mahimo nga gamiton ang produkto para sa kagamitan sa gyera kaangay sang drones kag missile systems.
Ginpanginwala ini ni Defense Secretary Gilberto Teodoro Jr., kag ginpaathag nga ang proyekto ang para sa pagpasanyog sang teknolohiya.
Samtang, ginpahayag sang Ibon Foundation nga mas ginpabaskog lamang ang kontrol sang mga dumuluong sa Pilipinas bangud nagadepende lamang ang pungsod sa teknolohiya sang mga foreigner samtang ang Pilipinas ang nagapabilin nga source sang cheap labor.
