Plano nga magpatukod sang Animal Shelter kag Pet Cemetery sa ciudad sang Bacolod.
Sa interview sang Bombo Radyo Bacolod kay Dr. Jec Cabuguason, assistant City Veterinarian sa Bacolod City, may pondo na nga P10 million nga natalana para sa pagtukod sang Animal Shelter nga may-ara sang covered dog shelter kag gated opened dog area nga may-attached naman nga animal health clinic.
Suno diri, yara na ang engineering design kag budget para sa proyekto kag ang location na lamang ang ginatul-id, apang sa inisyal ini ang plano nga itukod sa Barangay Granada.
Positibo naman para sa alkalde ang ideya, kag ang P10 million budget ang kuhaon naman sa P525 million nga kuntani pondo sa pagrennovate sang Burgos Public Market nga wala natigayon.
Ang animal health clinic ang ginapropose nga subsidized sang City Government.
Bangod sini, mas barato ang pagpabulong sa mga kasapatan indi kaangay sa pribado nga veterinary clinics, kag sila ang mahimo man makapanghatag sang libre nga bulong kag konsultasyon sa mga kasapatan.
Magluwas diri, ginpropose man nila kay Bacolod City Mayor Alfredo “Albee” Benitez ang pagtukod sang Animal Cemetery kag Crematorium, nga plano nga itukod sa Barangay Felisa.
Apang paathag ni Cabuguason nga ini ang plano pa lamang, kag sila ang magapatigayon pa sang site visit bwas.
Gin-athag naman sini nga magapadayun lamang sa pag-operate ang City Pound sa Barangay 35.
Indi nila luyag nga dulaon ang pasilidad bangod ini ang yara sa sentro sang ciudad.
Target sang mga ini nga ang masikop nga layaw nga ido ang dal-on sa City Pound, nga mas mahapos padulungan sang mga tag-iya sa paggawad.
Ang paggawad sang madakpan nga ido ang balor P500 bilang penalidad sa pagpatumbaya sang hinuptan.
Iga-inhouse sang tatlo tubtob lima ka adlaw sa City Pound ang mga sapat, apang kun wala sang may maggawad, ini ang dal-on sa Animal Shelter nga sarang makacater sang isa tubtob duha ka libo nga mga ido.
Sa pihak nga bahin, Suportado naman ni Bacolod City Mayor Alfredo “Albee” Benitez ang pagpatukod sang Animal Shelter, Animal Cemetery kag Animal Crematorium.
Suno kay Benitez, matahom ang plano, kag ginmando na sini kay City Administrator Atty Lucille Gelvolea nga ifinalize ang mga kinahanglan nga dokumento kag pending issues para sa Dog Shelter.
Paathag sini nga kun madayun, ini ang pinakadako nga animal shelter sa bilog nga Pilipinas.
Ang nasambitan nga pasilidad ang may covered dog shelter kag gated opened dog area kasubong man health facility para sa kasapatan.
Sarang diri nga makaigo ang isa tubtob duha ka libo nga mga ido.
Isa man sa manami nga plano suno sa alkalde ang Dog Cemetery nga ginalantaw ipahamtang sa Barangay Felisa.
Ini ang iya gid ginakonsiderar kag nagahulat lamang nga masumiter sa iya ang final concept sang proyekto.
Nag-ayo naman ang mga ini sang pondo para sa pagbakal sang salakyan nga magamit sang mga dog catchers sa pagbyahe sang mga layaw nga sapat sa City Pound kag pagdul-ong sa Dog Shelter.
