Nagpanghangkat ang pinuno sang Philippine National Police sa mga kapulisan kag iban pa nga sektor nga magbuligay agud malab-ot ang tinutuyo nga progresibo, malinong kag madinalag-on nga pungsod.
Sa speech ni PNP Chief P/Gen. Debold Sinas sa Ground Breaking Ceremony sang Negros Occidental Police Provincial Office (NOCPPO) Transient Quarters sa Camp Alfredo M. Montelibano Sr., Bacolod City sang Domingo, ginpahayag sini nga ang Voltes V amu personification sang leadership style nga ila sa karun ginahimo.
Suno sa iya, ang ini nga konsepto ang nagapakita sang operation, coordination kag collaboration sang PNP, mga ahensya sang gobyerno, pribado nga sektor, mga stake holders kag sang komunidad.
Suno kay Sinas, apisar nga nagkalain-lain ang ginhalinan sang lima ka mga sektor, kun magbuligay ang mga ini, wala sang pagpanghangkat nga indi masarangan nga mapierde.
Nagakumpiyansa man ini nga kun magkooperar kag mag-updanay ang nasambit nga mga sektor, masarangan sang pungsod nga malutos ang kun ano man ang nagapugong sa pag-angkon sang progresibo, malinong kag madinalag-on nga pungsod.
Suno sa iya, gingamit sini ang ini nga technique agud ipalab-ot ang konsepto sang pagbuligay.
Gindayaw naman sini ang kapulisan sa pagmintinar sang peace and order sa Negros Occidental.
Nagpahanumdum man ang PNP Chief sa mag kapulisan nga maghalong sa COVID-19 bangud sila ang ginakabig man nga mga frontliners kag mag-obserbar gid sang health protocols.
