Nagapati ang political analysts sa ciudad sang Bacolod nga indi na matabo ang People Power 3.
Sa interview sang Bombo Radyo Bacolod kay Atty.Jomax Ortiz, sa paglantaw sini indi man matabo ang ikatatlo nga People Power bangud nga una napriso na si Pastor Apollo Quiboloy nga amo ang lifeline sa financing; ikaduha si former President Rodrigo Duterte ang gin-aresto naman matapos nga madagdagan sang warrant of arrest sang International Criminal Court bangud sa crimes against humanity kag ang ikatatlo si Vice President Sara Duterte ang inug-impeach naman.
Suno kay Ortiz sang nagliligad pa man ginhambal na sini nga ang game plan amo nga piangon sang Marcos camp ang grupo sang mga Duterte.
Ini bangud nga kun mapiang na ang tatlo nga ginalakipan ni Quiboloy kag mag-amay nga Duterte wala na sang pwersa ang grupo sang mga ini.
Suno diri, indi na mapahalin ang presidente bangud nacripple na ang mga tawo nga nagahatag sang pwersa sa grupo kag ang isa pa ang mga Marcos ang nagauyat sa karun sang gahom.
Suno sa abugado ang nabilin na lamang nga paagi agud nga matigayon ang People Power kun ini ang suportahan sang militar bangud ang anay presidente ang nagdihon agud nga mapasakaan ang sweldo sang mga ini.
Suno diri ang nagakatabo nga mga rally ang temporaryo lamang bangud wala man ang mga ini sang financial capability nga magpadayon.
Ginpahayag man nga ang dapat gid nga lantawon nga ang yara sa puder sa karun amo ang nagapalakat sang gobyerno.
