May yara sang pagnubo sa power rate sang Central Negros Electric Cooperative, Inc. (CENECO) subong nga bulan.
Sa interview sang Bombo Radyo Bacolod kay Ma. Luisa Parroco, pinuno sang coop promotions section sang CENECO, 74 centavos per kilowatt-hour ang reduction rate subong nga Mayo.
Suno kay Parroco, ang reduction rate ang tuga sang nagtingub nga pagnubo sang generation, transmission, kag system loss charges.
Samtang, ginapahibalo man sang pamunuan sang CENECO nga may yara sag scheduled brownout sa Mayo 30 halin alas 06:00 sang aga tubtob alas 04:00 ang takna sang hapon.
Suno kay Maria Luisa Parroco, ang rason sang outage amo ang pagpatigayun sang NGCP sang opening and closing sang circuit breaker sa NGCP Compound sa Brgy. Mansilingan; Temporaryo nga de-energization kag reenergization sang Murcia substation; Replacement sang rotten 69kV transmission poles kag relocation sang 69kV transmission pole para sa safety; Replacement sang potential transformer sang Alijis substation revenue metering kag pagpatigayon sang preventive maintenance sang 30MVA Alijis substation; kag Line clearing sa Bacolod-Alijis 69kV transmission line kag Alijis feeders.
Ang mga lugar nga apektado amo ang ginasakupan sang AF1 tubtob AF7.
Gin-athag man ni Parroco nga may yara kun kaisa sang power outage nga nagakatabo nga indi man nila controlado.
Mapadayon naman ang black friday protest nga ginapatigayon sang mga empleyado sang Central Negros Electric Cooperative, Inc. (CENECO) sa tinutuyo nga punggan ang privatization sang electric cooperatives.
Suno kay Parroco, pinuno sang coop promotions section sang CENECO, wala man sila sang nabaton nga memorandum nga ginapauntat na sila sang ila ginapatigayon nga black friday protest.
Ginalantaw man nila nga epektibo ang ginpatigayon nila nga nationwide black friday protest.
Madumduman nga gin-umpisahan ini sadtong Mayo 14 halin alas 12:00 sang udto tubtob ala 01:00 ang takna sang hapon.
Isa ini ka silent protest sang mga empleyado agud ipalab-ot ang ila pagpamatok sa pag-abuso sang National Electrification Administration (NEA) sa ila nga gahom kaangay sang pagbutang sang general manager sang pila ka electric cooperative kaangay sang Benguet Electric Cooperative kun sa diin wala ginsunod sang ahensya ang ginpropose sang mga empleyado nga nakahibalo sang operations.
Nagapamatok man ang mga empleyado sa nagatuhaw nga takeover sang prangkisa ilabi na sa karon nga madali nalang mag-expire ang prangkisa sang CENECO kag may nagagwa nga madamo ang interesado sa franchise sini.
Una na nga ginpahayag ni Parroco nga kinahanglan nga amyendahan ang provisions sang Republic Act 9513 angot sa mga gahom sang NEA.
