Nauso na sa karun ang prank apang paano kun ang sadya-sadya lang kuntani mangin trahedya, kaangay lamang sa natabo sa isa ka banwa sa India.
Nangin trahedya ang prank sang mga pamatan-on sang mapatay ang lalaki nga ginhangkat sang mga ini nga magpungko sa box nga puno sang mga palupok sa Bengaluru, India.
Suno sa report, ginapahayag nga ginpapungko sang grupo sang mga pamatan-on ang lalaki nga nakaputi nga ginkilala kay Shabari nga sadto ang hubog nga yara sa tunga sang eskinita.
Ginpangakuan sang grupo sang kabataan si Shabari nga hatagan nila ini sang auto-rickshaw, isa ka sahi sang tricycle kun matuman sini ang challenge.
Matapos nga naglupok ang box nga may palupok, nagapungko sagihapon ang lalaki apang amat amat na ini nga nagdunglay kag naghigda sa kalsada.
Gindala pa sa ospital ang lalaki apang ginbawian ini sang kabuhi samtang ginabulong.
Nagviral man ang hitabo sa social media samtang gindakop man ang anum ka mga pamatan-on nga nagaedad sang 18 tubtob 22 nga responsable sa prank kag mahimo mangatubang sang kaso nga homicide.
