Nangin hugot ang seguridad sa ciudad sang Bacolod sa pagtambong ni Presidente Rodrigo Duterte sa birthday party sang Yanson matriarch sa isa ka hotel kagab-i.
Alas-10:21 kagab-i sang nag-abot ang presidential plane sa Bacolod-Silay Airport kag pila lang ka minutos ang nakaligad sang nag-abot ini sa Bacolod sakay naman sang presidential chopper.
Madasig nga nag-abot si Presidente Rodrigo Duterte sa L’Fisher hotel sa Dalan Lacson, nga venue sang 86th birthday ni Olivia Villaflores Yanson (OVY).
Si OVY kag ang iya pamilya ang tag-iya sang pinakadako nga bus company sa bug-os nga Pilipinas.
Magluwas kay Presidente Duterte, nangin bisita man ni OVY si Sen. Christopher Go, Ronald Dela Rosa, Cynthia Villar kag Imme Marcos kag pila ka Cabinet officials.
Nag-perform man sa party ang beterano nga singer si Basil Valdez.
Pasado alas-12:00 kaina sang kaagahon sang nagbiya naman sa Bacolod si Presidente Duterte.
Apang bangud sang hugot nga seguridad nga ginpatuman sang Presidential Security Group (PSG) kag kapulisan sa Bacolod, wala nahatagan sang kahigayunan ang katapo sang media nga makapalapit kag maka-interview sa Chief Executive.
