Natalana nga magpangayo sang kopya sang pre-feasibility study angot sa Panay-Guimaras-Negros bridge project ang provincial government sang Negros Occidental.
Madumduman nga gin-anunsyar ni Department of Public Works and Highways (DPWH) Secretary Mark Villar sang Sabado, Pebrero 13 nga natapos na ang pre-feasibility study para sa 32.47 kilometer nga bridge project nga may pondo nga P40 billion.
Sa interview sang Bombo Radyo Bacolod kay Governor Eugenio Jose “Bong” Lacson, ginpahayag sini nga magapadala siya sang sulat kay Villar agud nga makakuha sang kopya sang pre-feasibility study.
Dugang pa sang gobernador nga duha ka semana ang nakaligad sang nakabaton ini sang kopya sang sulat halin kay Environment and Natural Resources Secretary Roy Cimatu nga naka-address kay Villar kun sa diin nakasaad diri nga ikonsiderar man ang iban nga area sa Negros Occidental magluwas sa Pulupandan.
Suno kay Lacson, pila sa mga lugar nga ginakonsiderar ni Cimatu amo ang EB Magalona kag Victorias City nga patukuran sang taytay.
Nagapati naman ini nga pananglitan madayon ang proyekto, dako gid ang mangin epekto sini sa turismo kag ekonomiya sang probinsya kag sang bilog nga Western Visayas.
