BACOLOD CITY — Ginpasalig sang Provincial Veterinary Office sang Negros Occidental nga padayon ang ila monitoring agud mapasiguro nga hilway nagikan sa bird flu ang probinsya.
Iini ang pahayag ni Provincial Veterinarian Dr. Renante Decena kasunod sang outbreak sang bird flu sa China kag iban pa gid nga mga pungsod sa Asya.
Suno kay Decena, madamo sang mga precautionary measures nga ginapatigayon ang Veterinary Office agud mabantayan ang mga manok kag bibe sa bilog nga probinsya ilabi pa nga may mga migratory birds nga nagalabay sa sur nga bahin sang Negros Occidental kaangay sang Himamaylan City kag San Enrique.
Kada anom ka bulan suno kay Decena, nagakuha sila sang sample sa mga bibe kag manok sa southern Negros kag ginapaidalom sa laboratory test sa Manila agud malantaw kun positibo ang mga ini sa virus.
Apang sa pinakaulihi nga test, negatibo man ang mga ginkuhaan sang sample.
Nagpanugyan naman ini sa mga nagapanag-iya sang gamefarm nga likawan ang pagdiretso sa farm kun halin sa mga pungsod nga may yara sang bird flu.
Likawan man ang pagpasampok sang manok kun halin sa luwas agud masiguro nga wala sang risgo nga maglaton ang bird flu sa ginasagod nga manok.
