Nakasuhan na ang 22-anyos nga driver sang public utility jeepney nga suspetsado sa paghimulos sa isa ka menor de edad sa Purok Totong 2, Brgy Felisa, Bacolod City sang Marso 27.
Suno sa Bacolod City Police Station 10, kahapon nga adlaw ginpasaka ang kaso nga rape batok sa suspetsado nga si Maynard Bagallon Jr. sang nasambit man nga barangay.
Ini matapos nagpositibo sa sexual abuse ang biktima, kasunod sang medical examination nga ginpatigayon.
Nahibaluan nga halin sa eskwelahan ang biktima kag nagabantay ini sang jeep sang naglabay ang suspetsado kag gin hagad siya sini nga mag joyride.
Bangud kilalahay man lang ang duha, nagpadulong ang mga ini sa balay sang pakaisa sang suspetsado kag nag-inom.
Sang nahubog na ang biktima, diri nagluntad ang pagpanghimulos.
Nanugid ang biktima sa iya classmate sang natabo sa iya kag diri nahibaluan sang iya iloy rason nga ginpangita ang suspetsado.
Sa Police Station 7 pa nagpangayo sang bulig ang pamilya sang biktima agud madakpan ang suspetsado kag ginturn-over lang ini sa Police Station 10 bangud sakop sini ang lugar nga ginluntaran sang insidente.
Sang gin-usisa ang suspetsado, nag-ako man ini sa iya nahimo kag nagpangayo na sang pasaylo sa iloy sang 15-anyos.
