Tuman ang kasubo sang mga opisyales kag mga pumuluyo sa Barangay 16, ciudad sang Bacolod kasunod sang pagtaliwan ni Punong Barangay Erwin Arela.
Suno sa barangay secretary nga si Richard Arellano, nagtaliwan si Arela sa Metro Manila kaina sang aga.
Ang punong barangay ang nagpadulong sa Metro Manila sa katapusan nga semana sang bulan sang Hunyo agud magpakonsulta kasunod sang pagsakit sang iya likod.
Tinalikdan nga semana, nagpaidalom ini sa angioplasty sa tagipusuon ukon procedure nga ginapatigayon agud mapabalik ang normal nga pag-ilig sang dugo sa ugat.
Nangin madinalag-on ang angioplasty kun sa diin nakakas ang blood clot sa artery ni Arela kag nakatalana na kuntani ini nga magpauli sa Bacolod.
Suno kay Arellano, nakabaton siya sang impormasyon nga samtang nagahimos ang pamilya Arela nga magbalik sa Bacolod kaina sang aga, gulpyada lang nagsido ang punong barangay kag daw kaangay nga nasalam-ukan.
Gindala pa ini sa Philippine Heart Center apang ginbawian sang kabuhi.
Kahapon, nagtawag pa si Arela kay Arellano kag nagtugon nga mahimo sang circular nga nagadesignate kay Barangay Kagawad Joseph Delos Santos bilang acting punong barangay bangud magapahuway ini tubtub sa Hulyo 20.
Si Delos Santos ang nagserbe nga acting punong barangay humalin pa sang Hulyo 1.
Tuman naman ang kakibot sang barangay kagawad sa hinali nga kamatayon ni Arela.
