Nagpaandam ang Punong Barangay sang Brgy Ma-ao, Bago City sa mga fish vendors nga nagabaligya sa gwa sang merkado nga untatan na ang pagbaligya sa area bangod sa reklamo sang mga vendors nga nagapwesto sa sulod sang merkado.
Sa interview sang Bombo Radyo kay Punong Barangay Jovito Gahaton, nagareklamo ang mga vendors sa sulod sang merkado nga madutay na lamang ang nagabakal sa ila bangod mas ginapili sang customers nga magbakal na lamang sa mga nagapwesto sa gwa kay barato ang presyo.
Suno diri, nagareklamo man ang pari sang Aglipay church bangod iban sa mga nagabligya nagpwesto sa atubang sang simbahan kag nagasulod ang malangsa nga baho sang isda sa ila simbahan.
Suno kay Gahaton, ang mga nagabaligya indi man residente sang ciudad apang gikan sa banwa sang San Enrique, Valladolid, Pontevedra, Pulupandan, kag Hinigaran.
Makapila ka beses na sini nga ginpasaway ang mga fish vendor apang liwat-liwat lang sila nga nagabalik sa area.
Pa-athag sini nga wala sang problema kun nagalibod lamang sila sang isda apang ang ginareklamo amo ang pagplastar nila sang ila baligya sa gwa sang merkado kag wala man sila nagabayad sang arkabala.
Pahayag ni Gahaton, nagpaandam na ini sa mga fish vendor nga sumugod sa Dominggo dapat wala na sang may nagabaligya sa gwa sang merkado.
