BACOLOD CITY – Nag-imbento pa sang lain nga istorya ang announcer sang isa ka local radio station sa ciudad sang Sagay sa Negros Occidental agud taguon kuntani ang pagpatay sa kaugalingon nga misis, Miyerkules sang gab-i.
Ang suspek nga si Mudy Andalina, 33-anyos, ang napa-ako sang mga pulis matapos siya mismo ang nagpadulong sa police station agud isugid ang pagkapatay sang iya misis nga si Virginia sang Purok Martinez, Poblacion II, Sagay City.
Sa interview sang Bombo Radyo kay Police Chief Insp. Eduardo Corpuz, hepe sang Sagay City Police Station, ginsaysay ni Andalina nga ginpaarakan sang luthang sang mga armado nga lalaki ang ila nga balay kag naigo sa likod ang iya asawa nga gintunaan sang iya kamatayon.
Samtang gina-usisa, natalupangdan sang imbestigador nga may armas ang suspetsado sa iya nga sling bag kag may powder burn sa kamot amo gani nagaduda ang pulis nga siya ang may kahimuan sa krimen.
Sang nagtahaw na ang pagkahubog ni Andalina, gin-ako naman sini nga siya ang nagluthang sa matapos sila nag-away bangud sa gina-alegar sa third party kag nagahinulsol sa natabo.
Ang suspetsado ang priso sa karun kag natalana nga pasakaan sang kaso nga parricide.
