Ginbawi ni Rene John Nasis alias Negro ang una na nga pahayag nga paghimulos sa iya manak nga si Pearl Joy Galve.
Nahibaluan nga si Nasis ang ginpasakaan sang kaso nga rape in relation sa Republic Act 7610 bangod sa paghimulos sa biktima.
Madumduman nga si Pearl Joy ang namissing sang Hulyo 29 sa Barangay Sum-ag, Bacolod City kag nasapwan ang bangkay sa La Carlota City sang Agosto 13.
Si Nasis ang una na nga nag-atubang sa National Bureau of Investigation (NBI) – Bacolod kun sa diin ginpahayag nga ini ang nag-ako sa paghimulos sa biktima sang ini ang 12 anyos pa lamang.
Ini ang nag-ako man sang gin-interview sang Bombo News Team.
Apang sa latest nga paghinun-anon kay Nasis, ginkumpirmar sini nga siya ang nagatrabaho sa karun sa Dumaguete City, Negros Oriental.
Nakabatun man ini sang impormasyon gikan sa himata nga siya ang ginpasakaan sang kaso nga rape, kag ini ang ginpanugyanan nga indi anay magpauli.
Apang ginpanindugan sini nga magluwas sa wala ini sang kahilabtanan sa pagpatay, wala man sini gintandog ang manak.
Suno kay Nasis, sang naghinun-anon ini sa NBI kuntani nagpatawag sang media agud nabatian gid ang mga pamangkot kag ang iya sabat, sa panindugan nga wala ini nakabuya sang kaangay nga pahayag.
Apang sa pagpagwa sang statement sang NBI, ginpagwa na sang mga ini nga siya ang nag-ako nga ginhimuslan si Pearl Joy.
Dugang pa sini nga bangod sa madamo nga media ang dungan nga nagapamangkot sa iya, huo kag indi na lamang ang nasabat sini kag mahimo natuon sa pamangkot sa paghimulos ang pagsabat sini sang huo.
Mensahe sini kay Jennifer Galve nga sila ang adlaw-adlaw nga magkaupod kag wala ini sang tion nga himuon ang paghimulos.
Dugang pa sini nga ang iloy ang makapamatuod kun paano niya gin-atipan kag ginpalangga ang pamilya.
Ginpahayag man sini nga siya ang magatipon lamang sang kwarta kag bawion sini ang iya bata kay Jennifer.
