Doble-doble ang selebrasyon sang mga Republicans subong nga 4th of July, 258th Independence Day sang Estados Unidos.
Sa interview sang Bombo Radyo Bacolod kay Noor Moraña, Bombo International News Correspondent derekta sa Houston, Texas, ang US Independence Day ang isa sa main holiday sa America kag nagasunod lamang ang Christmas kag Thanksgiving.
Sa okasyon, wala sang klase kag trabaho, samtang may nanarisari naman nga aktibidad sa tagsa ka banwa, ciudad, county kag estado kaangay sang mga concert, speeches, mga hinampang kag nagatipon man ang pamilya para sa handaan.
Nagaserbe naman nga culmination activity ang paglantaw sang fireworks display nga mahimo patigayunon alas-10:00 tubtob alas-11:00 sa gab-i.
Apang mas maragtason para sa mga Republicans ang subong nga US Independence Day, bangod magluwas sa pagsaulog sa kadalag-an sadto gikan sa British colonization, ginaselebrar sang mga ini ang ginalantaw kadalag-an ni former US President Donald Trump sa November 5 Presidential Election.
Ini kasunod sang madinalag-on nga Presidential Debate kun sa diin ginalantaw nga dako ang nangin abanse ni Trump nga ginsundan pa sang ruling sang US Supreme Court nga nagahatag immunity batok sa lawsuit sa tanan nga official acts nga nakomiter sang former Presidents sa ila termino.
Ini ang ginatulok naman nga pagpabor sa kandidatura ni Trump nga nagahatag kumpyansa sa Republicans nga sila na ang daog sa eleksyon.
