BACOLOD CITY — Apat na lamang gikan sa 14 ka mga closed-circuit television (CCTV) cameras nga ginbakal sang Puentevella administration ang padayon nga nagaandar.
Ini ang ginkumpirmar ni Bacolod Traffic Authority Office (BTAO) Head Police Supt. Luisito Acebuche matapos personal nga nakit-an ang mga monitor sang CCTV nga nahamtang sa talatapan sang City Disaster Risk Reduction and Management Office (CDRRMO).
Nahisayran ni Supt. Acebuche nga ang iban sa mga surveillance cameras nga nahamtang sa mga dalanon ang wala na nagaandar samtang ang iban ang nadula na.
Sa pihak sini, suno sa BTAO Head, may manug-abot nga 32 ka mga CCTV cameras nga proyekto ni Mayor Evelio Leonardia kag sang Sangguniang Panlungsod.
Samtang, plano ni Acebuche nga ipatawag ang mga opisyales sang mga asosasyon sang mga depasahero nga salakyan nga nagabiyahe ukon nagapasaka sang pasahero sa Bangga Patyo ukon sa intersection sang Burgos-Lopez Jaena.
Ini ang ginpahayag ni Acebuche, sa interview sang Bombo Radyo, bangud sang madamo nga reklamo tuhoy sa paggutok sang trapiko bangud sa pagpasaka sang pasahero sang mga PUJs sa mismo intersection.
Suno sa BTAO Head, may mga traffic enforcers nga gin-deploy sa Bangga Patyo agud magbantay sa mga pasaway nga drivers apang indi malikawan nga may mga pasaway kag matig-a ang ulo.
Sa patigayunon nga dayalogo, iya pagahingyuon ang bulig sang natungdan nga transport organizations sa pagpaalinton sa ila mga myembro nga ginadumilian ang pag-pickup sang pasahero sa amo nga lugar.
