Ginkakibot sang mga tawo ang nasaksihan sang mga ini ang paglinumpat sang mga isda sa sapa matapos ang madamol kag mabaskog nga pag-ulan sa Shenyang, China.
Santo sa report, ginpahayag nga mga silver carp ang mga naglinumpat nga isda.
Ginakaon man ang silver carp sa pila ka mga lugar.
Apang sa video, wala sang tawo nga nagtesting nga magdakop sang mga isda.
Pila pa ka minuto ang nakaligad antes pa nagkalma ang mga isda.
Apisar nga tumalagsahon ini para sa mga residente, may nagluntad naman nga kaangay nga hitabo sa iban nga bahin sang China kaangay sang Zhejiang Province kasunod sang mga pag-ulan.
Nagsaka ang level sang tubig sa West Lake kag kinahanglan nga buksan ang floodgate agud nga malikawan ang pagbaha.
Ginpahayag sang mga eksperto nga nagalinumpat ang mga isda sa tion nga may pagbag-o sa kadasigon sang pag ilig sang tubig.
Nagakatabo ini sa kun nagabag-o ang oxygen level sa tubig.
Sa tion nagaulan, nagatuga sang mas mataas nga oxygen level sa mga ginapangisdaan.
Nagaserbe man ini nga paandam sa fish growers ang pagbag-o sa behavior sang mga isda bangud indi maayo ang tuman ang pagsaka ukon pagnubo sang oxygen level sa tubig.
