Maga-lunsyar ang city government sang Bacolod sang mobile stores nga ginatawag “Sari-Sari on Wheels” subong nga adlaw sa Barangay Taculing.
Suno kay Food Security Committee chairman Atty. Maphilindo Polvora, tinutuyo sang mobile stores amo ang makahatag sang access sa mga residente ilabi na ang mga pigado nga household nga magbakal sang ila pagkaon kag iban pa nga kinahanglanon subong nga quarantine period.
May yara man sang scheduled trips sa kada barangay.
Ang Sari-Sari Store on Wheels project ang ginapangunahan sang Liga ng mga Barangay sa pagpamuno ni Councilor Lady Gles Pallen.
Ang sin-o man nga may yara sang Home Quarantine Pass ang pahanugutan nga makabakal sa mobile store kag ipatuman man ang hugot nga implementasyon sang social distancing.
Kinahanglan nga imonitor kag i-assist sang barangay officials ang rolling store kun yara ini sa ila nga barangay.
Ginadumilian man ang massive buying sang mga produkto kun sa diin ang buyer ang pwede lamang makabakal para sa isa ka household.
Gin-abi-abi man sang city government ang mga businessman nga luyag mag-operate sang mobile store.
Dapat, lehitimo ang mga ini nga business owner kag may yara sang nagakaigo nga permit kag lisensya.
Lakip man sa inisyal nga mga requirements amo ang letter of intent kag litrato sang truck nga pagagamiton bilang mobile store.
Ang mga aplikante ang dapat nga magpasa sang forms sa Investment and Promotions Office kag ikontak ang Bacolod Business Development and Promotions Center sa 460-8409.
