Naghingyo ang secretary general sang National Citizens Movement for Free Elections ukon NAMFREL sa Kongreso nga icompel ukon piliton gid ang Commision on Elections (COMELEC) nga tinguhaan nga mapanami ang automated elections.
Ini ang kadungan sang imbestigasyon sang Kongreso subong nga adlaw tuhoy sa aberya sa 2019 elections.
Sa interview sang Bombo Radyo Bacolod kay NAMFREL Secretary General Eric Jude Alvia, apat na ka eleksyon ang ginpatigayon apang wala man gihapon sang pagbag-o kun sa diin sulit-sulit lamang ang mga issue.
Ginpahayag ni Alvia nga kada eleksyon, indi gid malikawan nga may pagduda ukon damo sa gihapon sang problema nga ginpangatubang ang pungsod.
Suno man sa secretary general, indi makalimot sa issue bangod padayon lang ini sa gihapon kun sa diin permi lang ginakalimtan ang mayor nga problema.
Suno pa kay Alvia, indi lang NAMFRFEL ang nagareklamo tuhoy sa sistema sang smartmatic kundi pati ang iban man nga grupo.
Iya ginpahayag nga dapat indi pag-itugyan ang eleksyon sa mga tawo ang eleksyon nga election law lamang ang nahibaluan kundi sundon ang iban nga pungsod nga ginaseparar ang management body.
Nahibaluan nga sa kabilugan, malapit na sa 16 billion pesos ang nagasto para sa eleskyon kag dako na ini nga kantidad sang kwarta.
Suno kay Alvia, dapat ipatuman ang lowest and responsive bid kun sa diin apisar nga manubo ang presyo, dapat ginalantaw man ang technical aspect.
Ginpahayag man niya nga dapat lantawon kun ano pa ang sarang madugang para sa pag-imprubar sang masunod nga eleksyon.
Samtang, nangin positibo naman ang reaksyon sang NAMFREL sa pahayag sang presidente nga islan na ang smartmatic bilang vote counting machine supplier sa masunod nga eleksyon bangod sa sulit-sulit nga kapaltahan sini.
Suno kay Alvia, presidente na mismo ang naghambal nga islan ang poll body gani nagakaangay gid lamang nga padayunon ini agud mauntat na ang problema kag issues nga nagagwa bangod napiyaran sini nga imbis masolbar ang issue, mas naglala pa ini.
Ginpahayag man ni Alvia nga indi lang makina ang problema kundi ang bilog man nga COMELEC kun sa diin kun kaisa gina-under man sang mga politiko bangud nagapangayo man sila kun may kakulangan sa ila opisina.
Suno man sa Secretary General, mas maayo nalang nga magbalik sa mano-mano ukon manual nga eleksyon kasubong sa iban nga pungsod agud mangin transparent sa pumuluyo ang resulta.
Naga-ekspektar naman si Alvia nga sa tuig 2022, masolusyunan na ang problema.
