Ginpahayag ni Senate President Pro Tempore Panfilo “Ping” Lacson nga dapat hatagan sang kahigayunan sanday Senador Ronald “Bato” Dela Rosa kag Christopher Lawrence “Bong” Go nga magamit ang tanan nga legal nga remedyo may kaangtanan sa posible nila nga kaso nga gina-atubang sa International Criminal Court (ICC).
Suno kay Lacson, dapat respetuhon ang mga lokal nga korte kag ang nagapadayon nga proseso sang Pilipinas sa bisan ano nga tikang nga mahimo himuon sang ICC, kasunod sang pagtudlo kanday Go kag Dela Rosa bilang mga co-perpetrators sa kampanya kontra droga sang nakaligad nga administrasyon.
Suno diri, kun magpagwa sang warrant of arrest ang ICC ukon bisan ano nga foreign court, kinahanglan ini nga magaagi anay sa mga lokal nga korte nga amo ang magpagwa sang nagakaigo nga mando antes ini mapatuman sa pungsod.
Dugang pa sang senador, pagatalakayon sang Senado ang mga posible nga tikang, lakip na ang bisan ano nga bulig nga mahimo ihatag sa duha ka senador kag mahimo man nga magpatawag sang caucus si Senate President Vicente “Tito” Sotto III agud konsultahon ang mga miyembro sang kongreso.
