Ginpanindugan sang operator sa fast craft vessel nga bentaha sa ila kun madayun ang pagbalik sang Negros Island Region (NIR) apisar nga magaseparar na sang rehiyon ang Negros Island kag Panay Island.
Sa interview sang Bombo Radyo Bacolod kay Frank Carbon, operator sa Weesam Express, merkado ang pagkabig sang shipping sector sa Panay kag Negros.
Pahanumdom sini nga may mga barko nga nagalayag gikan sa Mindanao, labay sa Visayas padulong sa Luzon vice versa.
Suno diri, gamay katama nga merkado para sa ila kun Panay Island ukon Negros Island lamang.
Dugang pa sini nga wala man sang may ginapagwa nga produkto ukon exports gikan sa Negros Island kag sa masami pasulod lamang sa isla ang mga produkto.
Pahayag pa sang negosyante nga kun ano ang mga malls, stores kag iban pa nga negosyo nga makita sa Panay Island, ini ang makita man sa Negros Island.
Gani para sa ila, makamaayo kun madayun ang NIR bangod mahatagan sang kahigayunan nga mag-uswag pa ang ekonomiya sang duha ka isla.
Dugang pa ni Carbon nga apisar separado nga rehiyon, kun magtin-ad na ang parehas nga isla, ang mga pumuluyo ang magatabok-tabok gihapon agud maglagaw.
Wala man sila nagakahangawa nga magbuhin ang pasahero sang barko bangod gamay lamang ang numero sang mga pumuluyo nga nagatabok bangod may ginaproseso sa mga Regional Government Offices.
Wala naman sang nakita nga mangin problema sa port operations bangod ang Philippine Ports Authority ang independent body kag indi apektado sa pagligwat sang lokal nga panggobyerno.
