Gin-aprubahan na sang Sangguniang Panlungsod sa ciudad sang Bacolod ang paghatag sang ‘special permit’ sa Bacolod Yuhum Foundation para sa pagpahamtang sang mga kiosko sa ciudad para sa paghiwat sang Masskara Festival sa bulan sang Oktubre 2024.
Sa interview sang Bombo Radyo Bacolod kay Councilor AL Victor Espino, chairman sang Committee on Laws and Ordinances sa Sangguniang Panlungsod, yara sa mandato sang local Sangguniang Panlungsod nga dapat mag-issue sang special permit apang si Bacolod City Mayor Alfredo “Albee” Benitez ang magadesisyon sang lugar nga mahimo butangan sang kiosko kag iban pa nga pwesto para sa Masskara Festival.
Suno kay Espino, sa ila nga session sang Miyerkules, nakapagwa na sila sang resolusyon nga nagahatag sang pahanugot nga mahatagan sang special permit ang Bacolod Yuhum Foundation bangud sa standing memorandum of Agreement sa ciudad sang Bacolod nga ini ang official festival director sang Masskara Festival nga pagahiwaton sa bulan sang Oktubre.
Gin-athag man ni Espino nga indi man maka operate legally ang mga kiosks kag booths kun wala sang special permit.
