BACOLOD CITY – Apisar wala pa nakagwa sa ospital, handa man sa gihapon nga magbalik sa inaway sa ciudad sang Marawi ang isa ka Negrense nga suldado nga pilason sa operasyon sang tropa sang gobyerno batok sa Maute Group.
Sa interview sang Bombo Radyo kay Corporal Rey Ga nga tumandok sang Barangay Dulao, Bago City, Negros Occidental kag miyembro sang 2nd Scout Ranger Company sang Philippine Army, ginpahayag sini nga handa siya nga magsunod sa ila nga commanding officer kun imando sini nga magbalik sa Marawi City.
Bilang suldado suno sa iya, anad na ini nga mapilasan sa engkwentro.
Suno diri, nakaagi na siya nga gindeploy sa madamo nga inaway apang ang Marawi ang pinakamadugay matapos kag pila sang iya mga kaupdanan sa grupo ang napatay sa una pa lamang nga adlaw.
Naga-rekober pa sa V. Luna General Hospital si Corporal Ga matapos ginpaidalom sa operasyon ang nawala niya nga kamot kun sa diin nautod ang isa niya ka tudlo kag nag-crack ang iya tul-an.
Ang suldado ang napilasan sang Mayo 27 samtang gina-rescue sang 2nd Scout Ranger Company ang armored vehicle sang militar nga gin-agaw sang terorista.
Ginapangamuyo man sini ang iya kapid nga si Corporal Roy Ga sang 4th Scout Ranger Company kag Sgt. Frederick Ga nga halin sa kampo sang militar sa Bulacan apang ginpadala naman sa Marawi, kag ang iya mga kaupdanan nga Scout Rangers nga mangin hilway ang mga ini tubtub nga matapos ang inaway.
Si Corporal Ga ang masobra napulo na ka tuig sa serbisyo kag napilasan man sa pila ka engkwentro kaangay sang natabo sa Julu, Sulu kag Zamboanga siege.
