Electrical in Nature ang nagluntad nga sunog sa Purok Magti-ayon, Barangay 10, Bacolod City kapin alas-12:00 kaina sang kaagahon.
Sa interview sang Bombo Radyo Bacolod kay Fire Superintendent Jenny Mae Masip, Fire Marshal sang Bacolod City Fire Station, ang sunog ang nag-umpisa sa ground floor sang balay ni Ramona Espinosa Estoche.
Kapin alas-9:00 sang gab-i, ginapahayag nga may nagakabatian na nga spark sa linya sang kuryente sa lugar, apang ini ang nadula man.
Ginalantaw nga ang spark ang ginhalinan sang kalayo nga naglamon sang 20 ka pamalay kun sa diin 14 ang totally damaged kag anom ang partially damaged.
Aminado man si Masip nga apisar makita lang sa Bacolod City Fire Station ang area sang sunog, sila ang nabudlayan sa pagsulod bangod naga-inikit ikit ang mga pamalay.
Gani ginpangsugpon-sugpon na lamang sang mga bombero ang mga hose agud malab-ot ang area sang sunog.
Bangod dako na ang sunog sang sila ang maka-abot, ini ang gindagdag na sa third alarm.
99 naman ka indibidwal ang apektado nga ginalakipan sang 58 nga adult, isa ka lapsag, 10 ka senior citizen, 28 ka kabataan kag duha ka persons with disability (PWD).
Yara lamang sa 600 square meters ang kahalitan sang sunog nga nagadangat sa balor P210,000.
Bangod sa insidente, pahanumdom ni Masip nga ipatsekyar gid ang mga daan na nga linya sang kuryente sa mga licensed electrician.
Ini bangod santo sa record sang Bureau of Fire Protection (BFP) – Bacolod halin 2023 tubtob 2024, mayorya sa mga sunog ang electrical in nature.
Pahanumdom man sini nga paluson gid ang plug sang mga appliances matapos gamiton kaangay lamang sang charger nga sa masami ginabilin nga nakasaksak apisar nga nakuha na ang cellphone.
