Ginalauman nga subong nga adlaw magwa ang resulta sang swab test sang una nga batch sang mga police personnel sa Negros Occidental Police Provincial Office (NOCPPO) nga ginpatigayon sang Miyerkules.
Sa interview sang Bombo Radyo kay NOCPPO Deputy Spokesperson Police Lt. Abegael Donasco, ginpahayag sini nga 50 ka mga personnel ang nagpaidalum sa RT-PCR test nga ginpatigayon sa molecular laboratory sa NOCCPO headquarters kun sa diin nalakip diri si Provincial Director Romy Palgue.
Suno kay Donasco, una na nga nagwa ang resulta ni Palgue kahapon kag negatibo ini sang virus.
Madumduman nga nalakip ang provincial director sa mga nagtambong sa Anti-Drug Summit sang tinalikdan nga Biyernes kun sa diin isa sa mga participants ang positibo sa COVID.
Apang gin-athag sini nga indi ini ang rason kun ngaa ginpaidalum sa swab test ang pinuno kag ang mga personnel bangud kabahin na ini sang programa sang Philippine National Police para man sa ila proteksyon.
Bangud nga isa tubtob duha ka adlaw ang time frame sang swab test, ila ginalauman nga magwa ang resulta subong nga adlaw.
Magapadayon naman sa masunod nga semana ang mga masunod nga batch sang police personnel sa headquarters nga ipaidalum sa RT-PCR test.
