BACOLOD CITY — Wala nalikawan sang valedictorian sang Philippine National Police Academy Maragtas Class of 2018 nga balikan ang iya mga inagyan halin sang gamay pa ini tubtub nga iya nalab-ot ang kadalag-an.
Sa valedictory address ni Police Cadet Fritz John Vallador sang Barangay IV, Kabankalan City, Negros Occidental, ginpahayag sini nga nagasaylo-saylo siya sang balay sang siya ang gamay pa.
Suno diri, wala niya nakita ang iya amay humalin sang ini ang ginbun-ag.
Apang gindayaw sini ang iya iloy nga si Ana Maria Vallador nga nagatrabaho sa karon sa Marbella, Spain bilang domestic helper.
Suno sa police cadet, salamin sang maayo nga mga overseas Filipino workers ang iya iloy.
Sa bata nga edad, natun-an ni Fritz John nga magpangisda agud makabulig sa iya lola kag lolo sa ciudad sang Himamaylan kag kun kaisa, nagabulig man ini sa pagbaligya sang mga kakanin.
Suno sa 24-anyos nga PNPA valedictorian, nagbag-o ang iya kabuhi sang gin-atipan siya sang mag-asawa nga Nelia kag Edwin Deocares.
Gin-atubang ni Vallador ang mag-asawa kag nag-emosyonal ini samtang nagapasalamat sa mag-asawa nga Deocares.
Aminado ang police cadet nga tuman kadamo ang iya kabalaslan sa mag-asawa.
Ginpalab-ot man sini ang pagpasalamat sang tanan nga PNPA graduates sa ila mga ginikanan nga nagsuporta sa ila tubtub nga makatapos.
