Ginatinguhaan sang Talisay City Water District nga gilayon nga masolusyunan ang reklamo sa lubog nga tubig sa Sugar Valley Subdivision sa ciudad sang Talisay.
Una nga nagmensahe ang residente sa subdivision, nga naghingyo nga indi na lamang hingadlan, natuhoy sa malubog nga tubig gikan sa gripo.
Pahayag sang tagreklamo nga ang problema ang nag-umpisa sang Biyernes, kag may tion man nga ini ang nagatin-aw, apang may-ara gihapon sang makit-an nga particles sa tubig.
Panindugan sini nga sila ang wala man sang problema sa pagbayad sang bill.
Ginpalasamatan naman ni Talisay City Water District General Manager Engr. Manolito Mendoza nga ginpadangat sa ila ang reklamo pinaagi sa Bombo Radyo Bacolod.
Suno diri, nag-umpisa ang problema sang nag igpat-igpat ang kuryente sang nakaligad.
Suno diri, sa mga unscheduled power interruption, nagakapatay man ang ila nga motor, kag sa pagbalik sang kuryente ini ang malubog na.// Makapila naman sila nagpatigayon ang flashing, apang nagakatabo gihapon sa tion nga hinali nga mapatay ang kuryente.
Ginalantaw ni Mendoza nga mahimo tuga man sang El Niño gani kaangay nga ginahak-ad ang tubig nga ginasuyop sang ila nga deepwell.
Paathag sini nga sa ila pagmonitor ang bahin lamang sang Sugar Valley Subdivision ang naga-eksperyensya sang kaangay nga problema.
Suno kay Mendoza, kadungan sang pag igpat-igpat sang kuryente, naglupok man ang ila panel board sa nasambitan nga subdivision.
Panindugan sang General Manager nga himuon nila ang masarangan agud mabalik ang matinlo nga tubig.
Gindugangan naman nila ang volume sang chlorine agud mapaputi ang tubig, apang aminado ini nga sa pagkapatay sang kuryente, nagakasudlan sang oxygen ang pipe kag nagatuga sang mga tina nga naggwa sa gripo.
