Wala ginarekomendar sang Department of Social Services and Development (DSSD) ang kaagahon pa lamang nga pagpila sa Bacolod City Government Center (BCGC) agud maka-avail sang cash assistance gikan sa BAYAD AGAD Program.
Sa interview sang Bombo Radyo Bacolod kay DSSD Head Alma Gustillo, indi dapat magkabalaka ang mga qualified recipient apisar nga halos P500,000 na lamang ang nabilin gikan sa P10 million budget makaligad lamang sang wala pa magdangat isa ka bulan.
Suno sa DSSD Head, madamo sang kagab-ihon pa lamang, nagapila na sa gwa sang talatapan agud maka-una ilabi na nga 160 lamang ang ila limit sa gina-akumodar kada adlaw.
Suno kay Gustillo, mahimo subong nalang nga semana ang malab-utan sang nabilin nga P500,000, apang pasalig sini nga kun maubos ang budget liwat naman nga magadagdag sang dugang nga P10 million.
Panindugan sini nga tubtob yara ang programa, magapadayun man ang pagbubo sang pondo gani wala sang dapat ikahangawa nga mahubsan kag indi maka-avail ang qualified recipients.
Sa pihak sang 160 a day nga limit, aminado si Gustillo nga nagadangat pa sa 200 kada adlaw ang ila gina-akumodar bangod magluwas sa regular recipients nga luyag magclaim sang burial ukon medicinal assistance, may-ara man sang special lane para sa persons with disability (PWD), senior citizens kasubong man sa mga pasyente nga nagapaidalom sa dialysis kag chemotheraphy nga personal nga nagapadulong sa talatapan.
Pasalig ni Gustillo tinguhaan nila nga ma-imprubar ang queeng system agud nga indi na magkahangawa nga malab-utan sang cut-off.
