Priso sa Bacolod Police Station 1 ang tatlo ka mga persona matapos gina-alegar nagpang-shop lift sa SM Store Northwing sa Barangay 12, Bacolod City sang nagligad nga Enero 28.
Ginkilala ang mga suspetsado kanday Relyn Sambilad, 24-anyos kag residente sang Purok Paghidaet, Barangay Taloc, Bago City; Denise Panibawan, 22-anyos kag residente sang Barangay Palaka, Valladolid kag Joel Vargas, 27-anyos kag residente sang Barangay Caliling, Cauayan.
Sa impormasyon nga nakuha sang Bombo Radyo Bacolod, gin-endorso sa police station sang complainant nga si Richard Gumayan Jr, 26-anyos kag empleyado sang amo nga mall ang tatlo ka mga suspetsado sang Hwebes sang gab-i matapos nga naaktuhan ang mga ini nga nagatuyo nga magpangawat sang assorted items nga nagabili sang P2,297.75.
Na-intercept ang mga suspetsado sang nagbayad sa counter si Vargas.
Sa karon nakahunong ang mga ini sa police station 1 para sa nagakaigo nga disposisyon.
