Nagdangat sa masobra 1,000 ka mga supporters sang Team Asenso ang nagtipon para magsuporta sa pagfile sang grupo sang Certficate of Candidacy.
Nagtambong sa misa ang grupo alas- 8:00 kaina sang aga kag matapos ini nagpadulong sa Bacolod City Public Plaza ang mga aspirants kun sa diin nagtipon didto ang mga supporters sang grupo nga nagasuksok sang tshirt nga nagaduag sang puti kag orange.
Ang mga supporters ang ginalakipan sang mga pumuluyo gikan sa mga nagkalain-lain nga brgy sa ciudad.
Bitbit sang mga ini ang mga tarpaulin nga may nakabutang nga picture nanday Bacolod City Mayor Alfredo ‘Albee’ Benitez, Congressman Greg Gasataya, kag Councilor Claudio Jesus “Kalaw” Puentevella.
Yara man ang 12 tanan ka mga aspirants nga nagpapili bilang konsehal sa ciudad.
Una nga ginpakilala ang mga konsehal sa plaza kag amo nga isa-isa nga nagpadulong sa opisina sang Liga ng mga Barangay para magfile sang ila COC.
Mas ginpakamaayo na lamang nga ginsira ang San Juan street para sa safety sang mga aspirants kag supporters.
Samtang, natapos nga matawhay ang pagfile sang Certificate of Candidacy sang team Asenso kaina sang aga.
Una nga nagfile ang mga magapapili bilang konsehal nga amo sanday; incumbent Councilor Jason Villarosa, Councilor Thaddy Sayson, Councilor Israel Salanga, Councilor Al Victor Espino, Councilor Em Ang, Councilor Celia Flor, Councilor Pao Sy, Councilor Vladimir Gonzalez kag fomer councilors nga sanday Barangay Singcang-Airport Punong Barangay Caesar Distrito, Homer Bais, Bobby Rojas kag Atty. Dindo Ramos.
Kasunod sini, nagfile na sanday Mayor Alfredo ‘Albee’ Benitez para magpapili bilang congressman sang Bacolod City Lone District; Bacolod City Lone District Congressman Greg Gasataya para sa pagka-alkalde kag nagfile sa pagka-bise alkalde si Councilor Claudio Jesus “Kalaw” Puentevella.
Nagpasalig man si Bacolod City Mayor Alfredo ‘Albee’ Benitez nga indi sini pagbayaan ang ciudad sang Bacolod sa pagpapili sini bilang kongresista sang Bacolod City Lone District para sa 2025 midterm elections.
Suno kay Benitez, magapadayon sa gihapon ang tanan nga transactions kag process sang pagsiguro sa stability kun sa diin magabaton sang award nga Efficiency in Collection ang ciudad bangod sa dako nga revenue nga nagenerate sang Bacolod.
Suno diri, ini ang sunod sa mandato sa tanan nga Local Government Units nga i-increase ang local resources.
Pasalig sang alkalde nga yara lang ini sa gihapon sa ciudad sang Bacolod bilang kongresista kaupod ang ka-tandem sini nga si Congressman Greg Gasataya bilang alkalde.
Samtang, gin-athag man sang team Asenso nga welcome sa ila ang challenge sa huring-huring nga si Councilor Al Victor Espino ukon si Councilor Thaddy Sayson ang magapapili bilang bise-alkalde apang ila ginsunod ang desisyon ni Benitez nga si Councilor Claudio Jesus “Kalaw” Puentevella ang iduso sang grupo para mangin Vice Mayor sang ciudad.
